ٺٽوي، رضي الدين فدائي: مير رضي الدين ٺٽوي، مير ابوالمڪارم شهود ٺٽوي جو ٻيو نمبر پٽ هو. مير رضي الدين جو تخلص فدائي ۽ فدا هو. مقالات الشعرا ۾ مير علي شير قانع ٺٽوي لکي ٿو ته، ”مير رضي پنهنجي وقت جو ڪامل شاعر هو. تخلص فدائي هو ۽ صاحبِ ديوان هو. سندس شعر ظاهري ۽ باطني ڪمالات سان لبريز آهي.“ مير رضي الدين فدائي جي ڪلام تي ناصر علي سرهنديءَ جو وڏو اثر هو ۽ ٻئي همعصر هئا. هي پنهنجي بزرگن وانگر هندستان ايندو ويندو هو. سندس انتقال 1120هه/1708ع ۾ ٿيو. مير رضي کي هڪ پٽ مير حيدر الدين ابوتراب ڪامل ٺٽوي هو، جيڪو پڻ پيءُ ۽ پنهنجن بزرگن وانگر نامور شاعر ۽ اديب هو. تذڪره امير خاني ۾ پير حسام الدين راشدي لکي ٿو ته، ”ممڪن آهي ته مير رضي جا ناصر علي سرهنديءَ سان دوستيءَ يا شاگرديءَ جا تعلق هجن، ٻئي همعصر هئا.“